Maxaa looga hadlay kulamadii beesha caalamka iyo Axmed Madoobe ku dhexmaray Kismaayo & dhambeelka loo geeyey.
Published on February 23, 2021 by admin · No Comments
Puntlandtimes (Kismaayo)-Madaxweynaha Dowlada Jubaland Mudane Axmed Maxamed Islaam ayaa Xarunta Madaxtooyada ku qaabilay wafdi heer caalami ah oo uu hogaaminayay Wakiilka gaarka ah ee Qaramada Midoobay u qaabilsan Soomaaliya Mr. James Swan.
Waftigaan uu hoggaaminayey Danjire James Swan waxaa qayb ka ahaa wakiilka Midowga Yurub ee Soomaaliya Nicolás Berlanga Martínez, Safiirka Talyaaniga, wakiilo ka socda midowga Africa iyo saaxiibada dhowa ee daneeya arrimaha Soomaaliya.
Masuuliyiintan ayaa yeeshay kulamo miro dhal ah iyadoo sidoo kale hab maqal Iyo muuqaal ah ay kaga qeyb galeen Safiirka Maraykanka u qaabilsan Soomaaliya Ambassador Yamamoto iyo Wakiilka Midowga Afrika Danjire Francisco Caetano Madeira.
Mudadadii ay socdeen kulamadaani ayaa waxaa diiradda lagu saaray xaaladda guud ee Soomaaliya, arrimaha doorashooyinka, khilaafka hareeyey fulinta heshiiskii arrimaha doorashada ee 17 September iyo sidii meel loogu wada jeensan lahaa.
Ilo xogagaal ah ayaa xaqiijiyey in Axmed Madoobe uusan weli ka soo degin meeshii uu ka taagnaa doorashada Soomaaliya gaar ahaan arrinta gobolka Gedo ee sababtay khilaafka daba dheeraaday ee doorashada Soomaaliya 2020 ilaa 2021.
